अणदूर (प्रतिनिधी) – श्रीराम जन्मोत्सवाच्या पावन निमित्ताने श्रीराम जन्मोत्सव समिती, अणदूर यांच्या वतीने समाजोपयोगी उपक्रम राबवत उद्या भव्य रक्तदान शिबिराचे आयोजन करण्यात आले आहे. मानवतेची सेवा आणि गरजू रुग्णांना जीवनदान देण्याच्या उद्देशाने आयोजित या शिबिराबाबत परिसरात उत्साहाचे वातावरण निर्माण झाले आहे.
उद्या सकाळी 9 वाजता जिल्हा परिषद शाळा, अणदूर येथे हे रक्तदान शिबिर पार पडणार असून, युवक, नागरिक तसेच सामाजिक कार्यकर्त्यांनी मोठ्या संख्येने उपस्थित राहून रक्तदान करावे, असे आवाहन समितीच्या वतीने करण्यात आले आहे.
रक्तदान हे सर्वश्रेष्ठ दान मानले जाते. एका रक्तदात्यामुळे अनेक गरजू रुग्णांना नवजीवन मिळू शकते. आपत्कालीन परिस्थितीत रक्ताची कमतरता भासत असताना अशा शिबिरांचे महत्त्व अधिक वाढते. त्यामुळे प्रत्येक निरोगी व्यक्तीने आपल्या वाढदिवस, उत्सव किंवा धार्मिक सणांच्या निमित्ताने रक्तदान करून समाजाप्रती आपली जबाबदारी पार पाडावी, असा संदेशही या उपक्रमातून देण्यात येत आहे.
श्रीराम जन्मोत्सव समितीने दरवर्षीप्रमाणे यंदाही सामाजिक उपक्रमांना प्राधान्य देत हा स्तुत्य उपक्रम हाती घेतला आहे. शिबिरासाठी आवश्यक सर्व वैद्यकीय सुविधा, तज्ज्ञ डॉक्टरांची उपस्थिती आणि रक्तदात्यांच्या सुरक्षिततेची पूर्ण काळजी घेण्यात येणार असल्याची माहिती समितीने दिली आहे.
तरी परिसरातील सर्व रक्तदात्यांनी या पवित्र कार्यात सहभागी होऊन रक्तदान करून गरजूंचे प्राण वाचविण्यास हातभार लावावा, असे आवाहन पुन्हा एकदा समितीच्या वतीने करण्यात आले आहे.
